【雷聲大雨點小】艾婆手記 – 亞洲博覽館篇

大家好,平時身邊人都會叫小女子艾婆婆,我雖然已過從心之年,但係婆婆依然精力充沛,到處尋找新奇有趣嘅科技時事資訊。想問婆婆點解咁大年紀仲要周圍走? 全因為婆婆個兩個乖孫由細細個開始,每日都係度用新嘅電子科技,而我一開始又唔識用,所以為左同兩個孫仔孫女拉近距離同唔想有代溝,正所謂讀萬卷書不如行萬里路,婆婆當時就決定身體力行,周遍大江南北,起行!

 

今次黎到位於機場附近嘅亞洲博覽館,係10月11-14號,亞洲博覽館舉行消費電子展,婆婆今日黎到為大家親身直擊,作一些介紹。

 

香港每一年都有大大小小各種唔同嘅展覽,分別係亞洲博覽館同會展,我都好鍾意去展覽。今次電子展到場人數唔算太多,婆婆一心黎到電子展尋找新科技產品資料同大家分享,點知道用左咁耐時間坐巴士黎到原來都唔係好特別,在場主要都係中國廠商製造嘅3D打印機,音響,滑鼠鍵盤,充電器等等主流產品,並未見到有特別產品。可惜大部份產品都係極為相似,唔好睇婆婆年紀大,其實我都好留意同了解市場上推出嘅新科技產品。我仲見到有Amazon推出嘅Alexa,不過個間公司唔係Amazon,可想而知,哈哈!

不過在場依然有一些可取嘅地方,例如一間叫Evapolar,佢地推出左一部輕巧可便携冷氣機。

話說呢件新產品係可以提高空氣潮度,同時吹出冷氣,外型唔錯,仲有七彩燈可以轉換,冬天乾燥,夏天嚴熱都可以使用。

 

雖然依部叫EvaSmart嘅機器唔能夠做到好方便携帶,同需要接駁USB電源,但係佢個概念真係好好,希望以後可以改善到輕巧同唔需要再接駁電源。話說婆婆都有英文底子,所以都可以好好了解佢嘅特性。為我講解嘅係一位叫Tatiana嘅妹妹,佢好細心介紹,仲送左一個佢自已國家嘅記念品比婆婆。

 

見到呢一啲裝飾同一部黑膠唱片機,婆婆頓時想起當年同老公係舞廳隨著音樂起舞嘅場面,好懷念! 我都好想買一部擺係屋企。

 

場外可以憑入場證換取記念品一份! 朋友仔經過唔好錯過

話說婆婆行到真係好攰,諗住睇下附近有無好餐廳慢慢坐低食一餐,點知道場地餐廳實在太貴喇! 好彩我自己有帶生果同水! 唔需要比咁貴食餐飯。

 

 

 

 

 

 

 

 

 

 

 

 

行行下原來都已經5點幾,一展位都睇得七七八八,婆婆今日嘅旅程就到此完畢,為左唔想再坐巴士返去,所以叫左阿仔過黎接我,

 

好喇! 各位朋友仔下次我會再同大家分享新奇有趣嘅新鮮事物,下次再見!!!! 唔好錯過艾婆手記,艾婆婆同大家講聲再會!

You may also like...

Leave a Reply